|
Novo !!! On-line zbirka pjesama Opus KSeZ! (Versi i delO)
|
*** |
Umjetnost.
Malo crne tinte,
Na vrhu gušćeg pera,
Ostavljena kao tanko-debeli trag,
Na pergamentu.
Umjetnost.
Zatočena u boci formalina,
Sitna i skrivena,
Od krupnih očiju,
Pomahnitalog potrošačkog društva.
Umjetnost.
Rafinirana jantarna boja,
Pretočena u balon čaši,
Zaštićena gustim zidom dima cigare,
Bez mogućnosti kupnje na kredit.
Umjetnost.
Daleko od debelog lanca,
Na dlakavim prsima,
Kao i gospođina bunda od nerca,
U kombinaciji sa dojučerašnjim opancima.
§
Gospođo! Lisica za Vašim vratom,
Čudno me promatra.
Odmaknuvši se i guštajući u Moreninim slikama,
Opazih kako lisica kanđama,
Para ulje na platnu.
|
|
Luka Skorić Betin, 2006.©
impresija nakon izložbe Morene Brnčić |
|
Dole va konobe Stara ******* |
|
Kada se va konobu,
Po koturate kalan,
Va škurine, blešće,
Samo obruči bačav,
I prazne kuki od pršut na gredah.
Ćutin dih dropav va čabre,
Ćutin dih nonota,
I njegovu ruku na mane.
Vidin kako na kaselice sedi,
I ordinuje.
Vidin nas četiri,
Nono, otac, kunjado i jas.
Mastimo, mešamo, provujemo,
Brontulamo, zijamo, vino delamo,
Pak se stanemo, nazdravimo, Dobremu letu.
Ćutin nonota,
Va našoj konobe.
|
Saka joj je na meste,
Kad je kot putana na ceste,
Z saken ima rigvarda,
Sakemu bi da ugodi,
Sakemu se prodava,
Za mići šoldi.
Za manjću,
Kako porta bagalji,
Bell Capitain, londiner,
Al´ bagažista,
Štorija je ista.
Spreda gimnazije Gervaisova bista,
Poete niš ni ćaro.
A ki se tu,
Ni gobil,
Po vrutkeh i puteh.
I kraji i krajice,
Grofi i grofice,
Poete i kantautori,
Artisti i pitori.
Mići i veli,
Stari i mladi,
Po lete,
Kad me bevanda hladi.
Vražja đelozija,
Kuka kot jena špija,
Ma kad neverin stori,
Pasa se lepo,
Grmi i hitaju streli.
Šajeta vraga dela,
Kumedija cela,
Rompa i miže,
I vali na lungo mare zdiže,
Šinjori poleje
Turisti va kamari beže,
Jadi se stara Opatija!
|
|
Luka Skorić Betin, 2003.© Luka Skorić Betin, 2003.©
Za nonića Ivana Trinajstića - Širolića |
|
Za Josipa Stanića Srhi |
|
Večer od libra,
Domaća beseda,
Šinjor Stanić recitira,
"Viš na kantune Drago stoji",
Srhi me pasuju,
Saku dlaku ćutin,
Oče mi suze,
Srce lupa; skače,
A glas dubok,
Puni uše,
Teplemi versi.
|
Prsti mi se igraju,
Po saken kuse,
Tvojga tela,
Tvoj dih, ćutin,
Tvoj mod, znan,
Skupa dišemo,
Na mojen uhe,
Čujen ti dah,
Skupa, nas srhi pasuju,
(Finilo je).
Stišnjena za mane,
Lepo spiš.
|
|
Luka Skorić Betin, 2003.© Luka Skorić Betin, 2004.©
nakon smrti Josipa Stanića | |
|
Istra |
|
Z jedne i druge bandi,
Ona,
Moja Istra.
|
|
|
Luka Skorić Betin, 2005.©
prijatelju Erniu Giganteu Deskovicu |
|
Moja mića gospodišna |
Bez tebe san,
Okvir bez sliki,
Botilja bez vina,
Prazan.
Z tobun san,
Salvador Dalí,
Châteaneuf du Pape,
Pun; kuražan.
|
|
Luka Skorić Betin, 2003.©
T..... |
|
Histri |
|
Epulon se ubi,
I bez velike borbe,
Nesactium pa.
|
|
Luka Skorić Betin, 2006.©
«miraculo terruit obscissae aque»
Tit Livije |
|
*** |
|
Malo rabi mi,
Gervais, Opatija, more,
Nasrhnjena vlas.
|
|
Luka Skorić Betin, 2006.©
za Dragu Gervaisa |
|
Mraf i neverin |
|
Vreme se j´ sfrdežbalo,
Sebojda će neverin,
Mraf je neboh pohajal,
I saki kušćić verta vižital.
Omput je kućetu ot rubinje storil,
Va lupinje postejicu svil,
Mići kacin nutre se skril,
I olešnjak do kraja pojil.
|
|
Luka Skorić Betin, 2006.©
Cvjetani Miletić |
|
Ulika |
|
Trda kot kamik,
Na ken je rasla,
Mučna kot suza,
Ka j´ z obraza pala.
Čekala je njega,
I po vetre i zime,
Znala je da će prit,
Ni prišal.
|
|
Luka Skorić Betin, 1995.©
za didu Josipa Skorića |
|
Poznan ju |
|
Poznan jednu žensku,
Tugu va sebe je skrila,
Poznan jednu činovnicu,
Ka j´drugu smenu doma storila.
Poznan jednu peršonu,
Nervožu, ma nervožu od jubavi,
Od dobroti da ti ugodi,
Poznan moju mat,
Ka se mi stori.
|
|
Luka Skorić Betin, 2003.©
mami |
|
Vreme |
|
Pol noći je odzvonilo;
Nova ura,
Novi dan,
Tik - Tak.
|
|
| Luka Skorić Betin, 1995.© |
|
Potok |
|
Zdola kamika, pod grotun,
Vanka voda zbija,
Suzice po mahe,
Plaču; Puze.
Abraceto se ćapaju;
I va škajicu kalaju,
A mići vrutak,
Kako baletan tanca.
Omput se zgube,
Pod zemjun; črnun,
Zadnjo kolo store,
I z moren se stope.
|
|
| Luka Skorić Betin, 2003.© |
|
Saka nan čast |
|
Kako smo lepo,
Zahitali potoki,
Makini za robu prat,
Stari auti, sakudar lati.
Kako je lepo,
Riban va more,
Na dne gumi od auti,
Jedan kup boc i mac verug,
Va lepo boke složeno,
Našoj dece za spomen.
|
|
Luka Skorić Betin, 2003.©
ED Žmergo i Duški Perić |
|
